Torsdag 3. september kan du få med deg ei spesiell oppleving i Domen på Soleggen.

Astrid Garmo og Jonathan Lengali er to unge kunstnarar. Med penn og fele er dei spådde ei lovande framtid. Hos båe går lengsel og utferdstrong att som ein raud tråd. Den urbane poeten Jonathan kjøpte eit forfalle småbruk i Nissedal og skreiv ei diktsamling inspirert av det. Garmoingen Astrid tok hardingfela med til hovudstaden for å blande tradisjonsuttrykk med moderne, sjangeroverskridande prosjekt. Resultata av desse indre og ytre reisene er tekster og melodiar som tar pulsen på det å vera ung vaksen i dag. 

Domen på Soleggen er eit bygg som innbyr til refleksjon og introspeksjon. Publikum blir inviterte til ei framsyning der dikt og musikk glir over i og spelar på kvarandre. I tillegg er akustikken i domen ein eigen del av opplevinga.

I år er det 100 år sidan samlinga Hamar i hellom av Olav Aukrust kom ut. Eitt av dikta i denne samlinga er det kjente Aksión på Tande. Ei av strofene i diktet lyder slik:
«Det vart eit namngjete, djevla ståk der,
va’ svartøygd tater frå nørdst i Skjåk der, –
og Randa-Knut’n
og Sanda-guten
og ‘n Nils Johansen innfann seg der,
og Nyjordsvetlen og ‘n Petter Per».

Kven var alle desse personane? Under Diktardagar får vi i alle fall vite meir om Nyjordsvetlen. Da vil forfattar Olav Norheim lansere bok om denne personen. Det skjer i Hågåhuset på Aukrust Gard og Urteri onsdag 2. september kl. 19.

I tillegg til foredrag og lansering blir det diktopplesing og musikk.

Draumar er tema for litteraturseminaret under Diktardagar 2026.

Litteraturvitar Jan Inge Sørbø tar for seg litteraturen og draumen, tittelen på foredraget hans er «Draumar som kraftkjelde, i litteraturen og livet». Journalist og forfattar Maria Lavik gav i 2024 ut boka «Odelsskam. Å gje slepp på ein gard etter femten generasjonar». Kva som var hennar draum heller enn å overta gard, fortel ho om på seminaret.

Ingrid Blessom, Åsne Sørlie-Nordnes og Nina Ophaug (alle tre busette i Vågå) skal snakke om det å følgje draumen, og kva draumen har hatt i seia for livet deira. Ingrid restaurerer eit gammalt hus, Åsne går på teaterhøgskulen, og Nina vart ufør etter ein skade og starta på ny utdannig og yogastudio.

Etter lunsj er det ei forandring i programmet. Filosof Lars Svendsen har dessverre måtte melde avbod. I staden kjem ein annan filosof, Einar Øverenget. Har kallar foredraget sitt «Lykkens filosofi».

Under seminaret blir det musikkinnslag ved Alf Hulbækmo, musikar frå Østerdalen.

Litteraturseminaret er i år på Ullinsvin i Vågå laurdag 5. september kl 10. Det blir servert lunsj, og det er høve til kjøpe billettar til heile eller delar av seminaret, med eller utan matservering.

Billettar finn du på heimesida www.diktardagar.no.

Ein litteraturfestival i Lom, Skjåk og Vågå 2.-6. september

Diktardagar blir arrangert kvart år første helga i september. Vi har kvart år nye og aktuelle tema. Det er fire diktarlag i Lom og Skjåk og to mållag i Lom, Skjåk og Vågå som er med i organisasjonen. I 2026 blir festivalen arrangert 2.-6. september.

Tema i 2026 er Draumar

Vi lever i ei tid som på mange måtar minner oss på krig og kriser, og ein del misser trua på at livet og verda går framover. Da er det viktig å halde liv i draumane, håpet og trua på at det er opp til oss å skapa framtida. Under Diktardagar spør vi kva framtidsdraumar dei unge har. Forfattarar og andre aktørar vil fortelja om sine draumar og vegval.

Litteraturseminar med foredrag, samtaler og musikk

Festivalen har i år som tidlegare eit litteraturseminar knytt til hovudtemaet, med foredrag og samtaler. Det blir mellom anna foredrag om håpets filosofi, om draumar som kraftkjelde i litteraturen og livet, om visjonslitteraturen og samtale med yngre lokale kvinner som har følgt draumen.

Årleg arrangerer vi eige seminar for ungdom, der vi inviterer ungdomsskulane og den vidaregåande skulan i Nord-dalen. Dette arrangementet har dei siste åra også vore strømma, så dei som ikkje kan vera til stades, kan følgje med. Eit aktuelt tema også her er draumar, håp og meistring. Her blir det samtale med ein elev som har gått gjennom kreftsjukdom. I tillegg skal elevar bokbade ein aktuell forfattar.

Forfattarbesøk til skulane i Vågå, Lom og Skjåk

Dei siste åra har alle 6. klassingane fått besøk av forfattar, og det har vore vellykka. Derfor legg vi opp til det same i år. Og sidan det for tida er mykje fokus på leseevne og leseglede hos barn og ungdom, utvidar vi nå tilbodet, slik at også 8. klassingane i dei tre kommunane får forfattarbesøk. Vi legg elles vekt på å ha med barn og unge i programmet, og arbeider for å få til ein skrivekonkurranse. I år får 6. klassingane besøk av forfattar Sunniva Relling Berg. 8. klassingane får besøk av Bobbie Peers.

Variert program

Det er Solrenning som har hovudansvaret for programmet i år, og Olav Aukrust vil få ein tydeleg plass. Mellom anna har vi tinga framsyninga «Himmelvarden», basert på diktverket til Aukrust, med lokale profesjonelle musikarar og formidlarar. Til opninga av festivalen har vi tinga ei framsyning frå Jotunheimen Underholdning, «Diktardraumar», jf temaet.

Vi får mange av dei faste postane elles, som bokbad, Tor Jonsson-foredrag, program på sjukeheimane.

Søndag kan publikum vera med på det vi kallar Steinkastvandring i Lia i Lom. Dette er eit alternativ til dei tidlegare utfluktene med buss. Berre steinkast frå kvarandre bur utøvande kunstnarar, og det er kunstarheimar og eit planlagt galleri med måleri av Gustav Wentzel.

I 2026 utvidar vi festivalen med ein dag, vi utvidar skuletilbodet og har eit par nye arrangement, konsert i ein dom på Soleggen og midnattsmesse med konsert i stavkyrkja i Lom. På den måten utviklar vi festivalen vidare.

Under «Program og billettar» og «Aktørane» på menyen kan du finne meir om programpostane og om forfattarane, musikarar og andre aktørar som deltar på festivalen.