Det er duka for eit særs gildt bokbad under årets Diktardagar. Vår trufaste bademeister, Magnhild Bruheim, har med seg tre av våre fremste forfattarar, Lars Mytting, Sigmund Løvåsen og Rønnaug Kleiva. Vi får i år gjensyn med dalens store suksessforfattar, Lars Mytting. Sist han var med oss på Diktardagar, sat han med eit ferdig manus til ei bok om det sære emnet ved som han hadde lite tru på ville nå ut til eit stort publikum. Vi veit alle at her tok han skammeleg feil. Etter suksessen med vedboka, har Lars kome med to nye bestseljarar, «Svøm med dem som drukner» og «Søsterklokkene». I «Søsterklokkene» er handlinga lagt til Gudbrandsdalen på slutten av 1800-talet. Sentralt i boka står eit par særeigne kyrkjeklokker og den 19 år gamle Astrid Hekne som er tenestejente hjå presten. «Søsterklokkene» er fyrste roman i ein trilogi, og mange lesarar ventar spent på neste bok «Hekneveven» som kjem 2. oktober

Vi gler oss også over å ynskje Sigmund Løvåsen velkomen attende til Diktardagar. Han var med oss i fjor og kjem att i år med ein rykande fersk biografi om Kjell Aukrust. Grunna 100-årsjubiléet for Kjell Aukrust, blir Sigmund svært sentral under årets festival. Han skal ha opplesing på biblioteket i Vågå, halde føredrag om Kjell Aukrust på Nordgard Aukrust, halde festtale på festkvelden og delta på bokbadet.

Med seg har karane ein av nestorane innan norsk og nynorsk dikting. Rønnaug Kleiva har gjeve ut i alt 29 bøker i ulike sjangrar, for både ungar og vaksne. Bøkene hennar er omsette til ei rekkje språk, og ho er representert med tekster i fleire antologiar og norskverk for ungdomsskule og vidaregåande skule. Det er ei stor ære for oss å ynskje Rønnaug Kleiva velkomen til årets Diktardagar.

A. Audhild Solberg er ein forfattar mange born og ungdommar har lese bøker av. Ho har mellom anna skrive serien om superbitchene, og i 2019 kom ho med spenningaboka «Harpa» som fekk ARK sin barnebokpris. «Harpa» er ei skikkeleg spennande bok frå ei bygd der det nesten berre er skog, det er visstnok ikkje så mykje som ei elv der, og likevel heiter bygda Elverdal. Agnes tykkjer det er kjedeleg at ho må reise dit i haustferien, men så byrjar det å skje grufulle ting rundt om i skogen. Ferien blir alt anna enn kjedeleg… 6. klassingane kan gle seg på det som nok blir eit spennande besøk under Diktardagar!

Frikk Gjeilo er ei ny lomsstjerne på stjernehimmelen. Han er låtskrivar og musikar, han er frå Lom og er fødd i 1989. Allereie i tidleg skulealder starta han å skrive tekster, men ikkje før for eit par år sidan byrja han å dele musikken sin med andre. Nå har dette resultert i fleire singlar som også ligg ute på Spotify, og snart kjem det eit heilt album. Tekstene til Frikk er på lomsmål, dei er såre, direkte og kjem rett frå hjartet. Under Diktardagar skal vi få høyre både musikk og dikt frå Frikk som deltek under festkvelden i Utgard laurdag. Foto: Alex Rostad

Vi er særs stolte over å fortelje at Lars Mytting kjem til Diktardagar i år. Lars Mytting er frå Fåvang, og vart kjent for «alle» etter å ha skrive boka Hel ved. Han har skrive i alt fire romanar, mellom anna Søsterklokkene som er den fyrste boka i det som skal bli ein triologi. Søsterklokkene er inspirert av lokale segner, og handlinga går føre seg på ein oppdikta stad i Gudbrandsdalen. Under Diktardagar vil Lars mellom anna fortelje meir om arbeidet med denne triologien, og særleg om bruken av forteljingar frå norddalen. Foto: Julie Pike.

Under Diktardagar sin festkveld laurdag 5. september blir det hiphop! Kjell Marius Snipen og Øystein Haugan i hiphop-duoen Dåm, tidlegare kjent som Ogobør, frå Dombås held konsert for oss, noko vi verkeleg gler oss til! Berre høyr her: https://www.youtube.com/watch?v=th2ywxbfvB4

Sigmund Løvåsen har gjort stor suksess under Diktardagar, og generelt i Skjåk, Lom og Vågå tidlegare. Vi er difor særs glade for at han kjem attende til oss nå i 2020. Sigmund vil i løpet av hausten vere aktuell med biografi om Kjell Aukrust, og under Diktardagar vil han fortelje om dette. Foto: David Aasen

Diktsamlinga ”Til fjells” er nå i sal hjå Loarutsalet i Lom, Vågå bok og leker i Vågå og Akantus blomster i Skjåk. Det er også mogleg å bestille boka ved å sende e-post til post@diktardagar.no eller ved å gå inn på nettbutikken til Lom folkebibliotek https://www.lom.kommune.no/tenester/kultur-idrett-fritid-kyrkja/lom-folkebibliotek/nettbutikk/. Ved bestilling kjem porto i tillegg. Elles er prisen for boka kr. 195.

Diktsamlinga er laga med tanke på at det skal vere mogleg å ta ho med seg på fjelltur, såleis har det vorte til ei fjellyrisk handbok. Det er Hanne Gran ved Skjåk folkebibliotek og Rita Mundal ved Lom folkebibliotek som har vore redaktørar, medan biblioteka i Lesja, Dovre, Sel, Vågå, Lom og Skjåk alle har vore med i innsamlinga av dikta til boka. Felles for alle dikta er at dei handlar om fjell. Dei fleste av dei omtrent 60 dikta er skrivne av lokale forfattarar, heilt frå Edvard Storm som var fødd i 1749 til Anna Kleiva som var fødd i 1985. (Foto: Hans Erik Kjosbakken/Fjuken)

Torsdag kveld tjuvstarta Diktardagar med budeiball på Billingen Seterpensjonat. Her var det stinn seter og høg stemning. Budeiene var sjølvsagt på plass saman med både spelemenn og dansarar. Songgruppa Fjelltite og Synne Stensgård song vakkert, Magnhild Bruheim las dikt frå den nye diktsamlinga «Til fjells», Hans Hågå fortalde frå seterlivet og vertskapet på Billingen Seterpensjonat stod for både spel, programleiing og ikkje minst skikkeleg god seterkost. På biletet er budeiene Randi Rust, Synne Stensgård og Aud Yttre Aaboen klare for budeiball.

Gudmund Moren kjem til bokbadet på Fossberg laurdag 31. august etter at Olaug Nilssen diverre måtte melde forfall. Det er tre kritikarrosa og aktuelle aktørar vi har med på bokbadet i år.

Brit Bildøen kom i 2018 med boka «Tre vegar til havet», som skildrar avmakt i møte med byråkratiet, og kva desperasjon kan gjere med eit menneske. Sigmund Løvåsen kom med diktsamlinga «Med øksene dei haustar inn» i fjor haust. Kulturlandskapet, jord- og skogbruk, dyrking og hausting er ramma for tekstane i denne samlinga. Gudmund Moren er ute med den heilt ferske boka «Okkupanter. Historien om Trudel og Georg Bauer», boka handlar om to ganske vanlege tyske okkupantar, og byggjer i stor grad på eit unikt brevmateriale mellom dei to.

– Har du høyrt suset i fjellet? Ekkoet frå dei som var her før oss. Syngjande songar om svunne tider.

Under Festkveld i Utgard laurdag vil Jotunheimen Underholdning presentere ei heilt ny framsyning. Endre Skjåk fortel dette: 

Gjennom dikt av Olav Aukrust og nyskrivne songar av Lars Bakke ynskjer vi å ta dykk med på ei reise bakover i tid og høgt til fjells. Til seterstular og budeier, huldrer og engelske fotturistar, i eit vakkert men farleg fjell. Vi har latt oss inspirere av historier og segn og  saman med dikt av Olav Aukrust knytta til fjella har dette vorte eit møte i fjellet om bruken av det til alle tider. Alt er sjølvsagt ikkje sant, slikt er det med dikt og fjas, men det meste kan ha vore det.

«Vindsus i fjell» er ei sjølvstendig framsyning på om lag 35 minutt som har vorte innspelt i løpet av vinteren. Dette er eigentleg eit forprosjekt til det vi håper kan bli ei lengre framsyning etter kvart, om fjella består.

Med: Lars Bakke, Eldri Tofte, Endre Skjåk og Reidar Svare. Musikkprodusent: Kenneth M. Lewis. Foto/video: Yury Rogachev.